BLANCH Y FOSCH

 

I lec plëgns y frëit assà pur podëi fa nëi; strategies de marketing, na cualité alta, n bun sorvij, düt chësc é important pur nosc turism y pur nosc bëgnsté. N dübe ai bëgn sce le bëgnsté dla porsona vëgn ma asozié a n tacuin plëgn y a n pinsir altamënter egozentrich.

A aldì i comentars de val aconsiadù comunal de nosc comun pèl propi de sce. Al pe che l’imaja de nosc paisc de Corvara sides plö importanta dla situaziun, dramatica, de porsones che chir n daciasa. Mo ci imaja pa? Ne el nia nosc comportamënt tan da egoisc a dé na burta imaja? Val nosc rapresentant politich é bëgn dl opiniun che n’imaja de “n gran y burt y fosch che sprigora pici y gragn” ne passenëies nia ite tla blancia Alta Badia. A aldì val aconsiadù comunal messun se fa pinsiers söl igiene de chëstes porsones; ne ves vëgnel nia in mënt val bur tëmp passé? Y mo chi é pa chisc che é, sciöch al vëgn dit “massa atramënter”? El mo terrorisc? Comunisc mangiamituns? Bruti moderns descendënc dai romans concuistadores che vëgn a se mët sot cun lingaz, identité y kalashnikov?

Les paroles dites ufizialmënter a na sentada de comun me fej punsé sura dassën te ci monn che viun, sura l’ipocrisia dl homo oeconomicus. An pudess ince jì plö ti detais, pur ejëmpl dla orenté da mët sö n cuoziënt te ciasa di atri. Nosc comun che ti dij de no a na domanda d’aiüt dl comun de La Val tla cuestiun profugs. Y ulà é pa rovades les beles paroles che baia de colaboraziun?

I argumënc sura la cuestiun muciadus tl Consëi de Comun de Corvara dl 21 de dezëmber, é fora de vigni pinsir plö elementar cun n minim de sëns de responsabilité. Ne se rendun nia cunt, che ci ch’al suzed söl monn é ince gauja nosta? Minun veramënter ch’al sides na soluziun “se paré cun mans y pisc” dal forest? Mo oligarchi rusc y kazaki dai dejideri fora dl normal y lavatais serbi sënza pretejes, y jënt che paia miliuns pur se cumpré jö les ciases fates sö da nosc nenesc, ah, chi düc va bun assà! Ne se rendun nia cunt che ince nostes generaziuns passades à patì la fan y s’en je demez da chilò pur nezessité? Y ne punsun nia ch’i un pö ma la fortüna y nia l’mirit, de ne ester nia nasciüs 5000 chilometri plö injö?

Nou, chësta ne pudun nia azeté. I ves damani, aconsiadusc comunai, manco zinism y brutalité. Les desfides tl dagnì sarà grandiscimes y nos un le dovëi de se dé da fa, avisa y deplö ciamò de sciöch se dun da fa pur de beles pistes y la cualité de ospitalité.

Tulede tles mans la situaziun, metesse adüm ai atri comuns dla Val Badia y desmostrede de ester porsones che ne à nia ma spirit imprenditorial, mo dantaldüt ince valurs y n spirit sozial. Ala fin saràl pa l’amur che salvarà l’monn y dessigü nia i mürs che vëgn metüs in pé.

michil costa, La Usc di Ladins, 20/01/2017

usc

Rispondi

Inserisci i tuoi dati qui sotto o clicca su un'icona per effettuare l'accesso:

Logo WordPress.com

Stai commentando usando il tuo account WordPress.com. Chiudi sessione / Modifica )

Foto Twitter

Stai commentando usando il tuo account Twitter. Chiudi sessione / Modifica )

Foto di Facebook

Stai commentando usando il tuo account Facebook. Chiudi sessione / Modifica )

Google+ photo

Stai commentando usando il tuo account Google+. Chiudi sessione / Modifica )

Connessione a %s...